27.11.2017

Skilagreinar sendar út og fréttabréf með

Sjóðfélagar fá þessa dagana inn um póstlúgurnar sínar sjóðfélagayfirlit dagsett 11. nóvember 2017. Með fylgir nýútkomið fréttabréf Birtu.

 

Sendinguna fá sjóðfélagar sem greitt hafa iðgjöld í samtryggingu og/eða séreign hjá Birtu frá 1. maí til 31. október 2017.

 

Fréttabréf Birtu lífeyrissjóðs er 2. tbl. 2017. Þar er á forsíðu fjallað um nýjar lífeyris- og lánareiknivélar sjóðsins sem fá lofsamlega dóma og þykja aðgengilegar, auðveldar í notkun og veita skýrar, myndrænar og auðskiljanlegar upplýsingar.

 

Í fréttabréfinu er haft eftir framkvæmdastjóra Birtu lífeyrissjóðs, Ólafi Sigurðssyni, að á fyrri hluta árs 2017 hafi verið vöxtur í iðgjöldum og lánum. Þá hafi rekstur og ávöxtun verið talsvert betri en á fyrri hluta árs 2016 „þegar alþjóðlegir fjármálamarkaðir nötruðu vegna bakslags í Kína og þeirrar ákvörðunar Breta í þjóðaratkvæðagreiðslu að segja skilið við Evrópusambandið.“